يوم الخميس الماضي دُعيت لإيفنت مجموعة زيت الأرغان البرّي الجديدة من ذي بودي شوب، أشكرهم على الدعوة اللطيفة
كنت جدا متحمسة للمجموعة لأن مجموعاتهم عادة تعجبني بس كمان لأن فيها زيت الأرغان حسيتها بتكون مميزة.
وقبل الإيفنت إشتريت كمان كم حاجة من ذي بودي شوب وحبيت أنزلهم مرة وحدة ببوست واحد p;
Wild Argan Oil Collection
في البداية عرفونا على أصل المجموعة وكيف تصنعت ونظام التجارة العادلة في بودي شوب، وأكيد عارفين إن زيت الأرغان البرّي مصدره من جبال الأطلس في المغرب.
ذي بودي شوب إستعانو بنساء بربريات من المغرب عشان يقتطفو ثمار زيت الأرغان بعناية ويحرصو جدا على جودتها وبعدها يستخلص منها الزيت وهذا فيديو كامل تقدر تشوفو قصة بداية المجموعة
والفيديو مترجم من صديقتي البلوقر بيان
بعد مايستخلص الزيت ويفلتر، ذي بودي شوب يصنعو منه مجموعة زيت الأرغان وهو المكون الرئيسي بالمجموعة بالإضافة إلى عدة زيوت أخرى زي الشيا واللوز والكاكاو وغيرهم؛ ولأن زيت الأرغان يعتبر جدا غالي وأسعار بودي شوب متعودين عليها إنها بحدود المعقول عملو هذا الشيء عشان نقدر نستفيد من زيت الأرغان وفوائده بدون مايكون جدا غالي وراح أحطلكم الأسعار بالنهاية وحتشوفوها.
طبعا فوائد زيت الأرغان مايحتاج أتكلم عنها الكل عارف قد إيش هو مهم ومفيد لجمال الشعر والبشرة والجسم
وحلو تستخدمي المجموعة مع بعض عشان تقدري تستفيدي منها من كل النواحي.
وبنفس الوقت كمان تقدري تدللي نفسك وتحسي بالإسترخاء..
الديكور كله كان مغربي جميل جدا للأسف ماقدرت أصور كل شيء والجلسات هذه عملولنا عليها مساج لليدين وكان بقمة الروقان والدلع.
المنتجات اللي نازلة بالمجموعة:
زي مانتو شايفين في منتجات جديدة على بودي شوب بالمجموعة مو زي المعتاد شاور جل وسكرب وزبدة ولوشن وبس
لا في كمان زيت رغوة للحمام وفيه زيت الارغان للبشرة والجسم والشعر وفي صابونة المساج والزيت الصلب.
والمجموعة مع بعض كلها راح تعطيك نظافة ودلع وجمال بالإضافة الى ريحتها الرايقة الجميلة.
وبالنسبة للأسعار سألونا كم تتوقعو أسعارها، صراحة شطحنا بتوقعاتنا مرة لووول وطلعت أسعارها جدا معقولة
وهذه المنتجات اللي راح أجربها من المجموعة
أكيد كل شيء راح أتكلم عنه بعد التجربة إذا حبيتهم أو لا وعموما تعجبني مجموعات بودي شوب ومتوقعة إني مرة راح أحب هذه الكولكشن :*
وراح أشتري الزبدة والسكرب ومرطب الشفايف إن شالله.
Haul
وبالنسبة لمشترياتي قبل أسبوعين تقريبا
زبدة الشيا وزبدة الكاكو وليفة وفواحة الرمان والكرز هذه من سنيييييين أستخدمهم وإشتريتهم كثيير
وأظن شوفتوهم كذا مرة بالبلوق أو إنستقرام.
اللي جديدة عليا:
كريم اليد بالورد وفيه حماية من الشمس -
جربت مرطبات ثانية بس هذا أول مرة أخذه وحبيت إنه فيه حماية.
- سكرب الكرز وسكرب العسل
كانو عندي منتجات ثانية من نفس هذه المجموعتين بس أول مرة أجرب السكرب بالعسل واللي بالكرز حبيتهم والإثنين مختلفين شويه عن بعض راح أتكلم عنهم أكثر إن شالله بس أجربهم.
- زبدة المورينجا
ريحتها نظييفة وفريش وترطيبها مو مرة قوي زي الشيا والكاكاو حلو أستخدمها خلال اليوم وعلى فكرة أنا بشرة جسمي جافة وتحتاج ترطيب عالي.
بالنسبة للأسعار:
- الزبدات كلها ٧٥ ريال
- السكرب ٦٢ ريال
- الفواحة ٢٦ ريال
- الليفة ١٥ ريال
- مرطب اليد ٥٩ ريال
وأخر شيء هذه كمان منتجات جديدة راح تنزل في بودي شوب قيد التجربة وراح أعملهم ريفيو إن شالله
:من اليسار
- سموكي جل ايلاينر باللون البني للعيون والحواجب.
- برايمر All-in-one لتحت العين. شكله يحمس!
- معالج لتحت العين Drops of youth
- مرطب زبدة الشيا لليد بحجم صغير.
وبس إن شالله عجبكم البوست أشوفكم إن شالله ببوست جدا قريب :*
No comments:
Post a Comment