Friday, April 22, 2016

Kat Von D Products Review! تجربتي لمنتجات كات فون دي








كات فون دي صارلها شهر تقريبا نزلت عندنا بكل فروع سيفورا بالسعودية والصراحة خطوة مرة حلوة لأن البراند مشهورة ومعروفة وكانت بس حصريا بسيفورا امريكا وصعب نوفرها هنا.
انبسطت لما نزلت عندنا وجربت تقريبا اغلب اللاين تبعهم وكالعادة بعطيكم رآيي بالمنتجات بالتفصيل وايش اللي انصحكم تجربوه.
كات فون دي اساسا تاتو ارتيست فتشوفو اغلب اللاين حقها ارتيستك وجريء والوانه قوية
حتى الفاونديشن والكونسيلر مصممين بتغطية عالية لدرجة يغطي التاتو.
اللاين الباكج حقه مرة جذاب اسود برسومات جميلة.
اسعارهم مقاربة لماك واربن ديكاي مو مرة مرتفعة ولا رخيصة وبشكل عام منتجاتهم جودتها حلوة ومتعوب عليها.






راح ابدأ اول شيء برأيي في منتجات الوجه الفاونديشن، الكونسيلر والباودر

 Kat Von D Lock-It Foundation

الفاونديشن مختلف عن كثير فاونديشنز مجربتها! وقعدت فترة وكذا استخدام لما عرفت استخدمه بالشكل الصحيح وعجبني.
لأن تركيبته قوية جدا تغطيته عاااالية نسبة البيقمنت فيه عالية يعني راح تعطيك تغطية فظيعة بس انتبهي من الكمية
اذا كثرتي راح يصير مو حلو ويكتل وشكله بشع
جربت احط ضغطة وحدة وادمجها تمام مع البشرة اعطتني نتيجة حلوة وثاااابتة مايتغير ولا يقلب لونه هم يقولو يثبت ٢٤ ساعة صراحة ماجربت مادري مين يتحمل يجلس بالمكياج ٢٤ ساعة! :\
بس فعلا ثبت معايا طول وقت طلعتي ٥ الى ٦ ساعات مادهن وللامانة ماحسيت انه ثقيل عالبشرة يعني عارفين احساس الفاونديشن الثقيل كأن شي جالس على قلبك؟ هذا لا مو مرة حسيت فيه مع ان تغطيته ممتازة.
جميل بالتصوير على فكرة ومهم جدا ترطبي قبله واستغني عن المرطبات المطفية لان الفاونديشن اولريدي مطفي
استخدمت قبله برايمر فوريفر المرطب وطلع فظيع معاه، اي برايمر مرطب راح يؤدي الغرض.
طريقة التوزيع اللي عجبتني اسويله بفنغ بفرشة ريل تكنيك على كل الوجه بعدين اطبطب بالبيوتي بليندر.

راح يناسب البشرات الدهنية والمختلطة واللي عندها عيوب وتدور فل كفرج جدا بيعجبك.
الجافة ممكن مايناسبك
وأهم شيء خذو سااااامبل وجربو خلي معاك علب صغيرة او علبة عدسات وحطي من الفاونديشن كم نقطة وجربيه بالبيت على راحتك وبنفس روتينك العادي بالفاونديشن حتى تقدري تحكمي عليه مزبوط.

درجتي ٥٤ لونها مصفر بيرفكت اذا درجتك بماك NC40 ممكن تناسبك
وعندهم درجات كثيييير ٢٠ درجة بمختلف الاندرتون جدا احترم البراند اللي تنزل درجات لكل الناس مو درجتين بيضا ووردية وبس :)

سعره ١٧٥ريال


Lock-It Concealer

نفس الفكرة، التركيبة فيها نسبة بقمنت عالية يعني تغطي بشكل كبير اي عيوب عندك ندبة جرح هالات حبوب تاتو اي شيء حابة تغطيه راح يغطيه لك
تركيبته كريمية تنشف وتصير مات يعني وزعيه بسرعة وبعد كذا راح يثبت بمكانه
اذا انتي من النوع اللي ماتحبي الفل كفر لوجهك بس عندك عيوب حابة تخفيها خذي فاونديشن خفيف واستخدمي هذا الكونسيلر معاه راح يعطيك تغطية مرة حلوة بالاماكن اللي حابتها.
علبته عصار عملية واستخدامها مريح.
عندهم ٩ درجات وممكن تاخذي درجات افتح تعملي فيها هايلات.
سعره ١٠٠ريال


 Lock-It Powder Foundation

باودر فاونديشن مضغوطة فيها تغطية وتركيبتها ناعمة مو باودري ومو كيكي
تقدري تستخدميها لوحدها كفاونديشن يومي بعد كريم واقي الشمس وانا هذه طريقتي المفضلة لها حطيتها بمفضلاتي الشهر اللي فات استخدمها مع فرشة بفنغ تعطيني لوك مات وناعم لكل يوم.
وممكن تثبتي فيها الفاونديشن بالسهرات راح تعطيك تغطية اضافية.
عندهم ١٨ درجة وارقامها نفس الفاونديشن
سعرها ١٦٥ريال






Shade + Light Face Contour Palette

باليت الكونتور سوا ضجة لما نزل! سويت مقارنة بينه وبين انستازيا واشوف فيه مميزات وعيوب.
بالنسبة لمميزاته التركيبة انعم واحلى بكثثيييير من انستازيا اللون يندمج بشكل اسرع واحلى عالبشرة
درجات الهايلايت اوضح خصوصا اللون الاصفر يعطي تنوير تحت العين عكس اللي بانستازيا بس احسه تثبيت ماينور.
بس عيبه اتمنيت لو فيه درجة دافية شويه نقدر ندفي فيها الوجه او نستخدمها كبرونزر مرة بيكون بيرفكت.
ناسبتني الالوان اللي بالنص بس من فوق وتحت. باقي الالوان ياغامقة او فاتحة مازبطت مع لون بشرتي.
الباليت برأيي مفيدة اكثر شيء للي يشتغلو بالميك اب لأن فيها اكثر من درجة تناسب جميع البشرات وممكن تستخدميها للعين شدو خفيف طبيعي.
سعره ٢٢٠ريال

Shade + Light Face Contour Brush

الصراحة الفرشة مرررة حلوة وعملية. تجي بطرفين مدبب وبزاوية
جودة الشعر ناعمة وتدمج بشكل مرتب.
المدبب ممتاز للهايلايت وتثبيت تحت العين.
اللي بزاوية حلو للكونتور او البرونزر وحتى للبلاشر.
مع اني مااحب الفرش اللي بطرفين عشان مااعرف كيف اخزنها لأن احب احط فرشي بكاسه
بس هذه استثناء ومخليتها بالتابوت حقها الجميل :( ههههه
بتكون مفيدة جدا بالسفر وتريحني من اني اشيل كذا فرشة
سعرها ١٥٠ريال




بالنسبة لمنتجات العين اكحال ايلاينرز وماسكارا

  Tatto Liner

لو بنصحكم بمنتج واحد بس من الماركة كلها بيكون التاتو لاينر!
من افضل اقلام اللاينرز الموجودة بالسوق
دقيق وسهدل جدا بالرسم والبرودكت نفسه سواده عالي وثابت حتى بمدمع العين
اللي يميزه انه قلم يعني استخدامه سهل جدا للمبتدئات.
حبيت انه يتقفل باحكام ومايخلي اللاينر ينشف بسرعة بالتالي راح يطول عندك.
عيبه ان اللاينر فيه شويه لمعة بس تقدري تخليه مطفي بالشدو الاسود.
غير كذا منتج رائع جربوه
اللون البني منه جدا طبيعي وتقدري تستخدميه للحواجب كمان اذا حابة ترسمي شعرات صغيرة.
وعندهم كثير الوان والوان اللاينر حقتهم واضحة وقوية.
سعره ٩٩ريال

Immortal Lash 24 Hour Mascara

الماسكارا اكثر شيء تعطيك تطويل وتفريق للرموش ماتكثف فرشتها تشبه ذير ريل لحد كبير عشان كذا ناسبتني
سوادها عالي وثباتها حلو بنفس الوقت تتنظف بسهولة.
سعرها ١١٥ريال





Eyeshadows

جربت نوعين الباليت والميتال اي شادو الجديدة

الباليت بالصورة هي اللي عندي وعندهم الوان باليتات ثانية احلى
هذه حسيت الوانها باردة وفاتحة اغلبها ماناستني الموف اللي فيها دافي وانا احب الموف البارد عشان كذا مو مرة حبيت الالوان شخصيا، لكن بكلمكم عن الجودة وجربو باليتتاهم الثانية خصوصا المات،
جودتها عالية صبغة اللون قوية ثباتها حلو تشبه لوراك الى حد كبير
وبنفس الوقت سهلة وناعمة بالدمج وتمسك اللون بسرعة.
اسعار الباليتات ٢٢٠ريال

بالنسبة للميتال كرش مرررررة عجبتني شدوات ميتاليك بلمعة ولمعتها تجنن وبمسحة وحدة تبان
اذا بللتي الفرشة بفكس بلس كمان بتطلع فظيعة وبيرفكت للسهرات. عندهم ١١ درجة جربو الالوان الفاتحة لو حابين لون هايلايت لزاوية العين بيطلع مرة حلو وواضح.
الدرجات اللي عندي Black No1 لونه رمادي على زيتي يعطي انعكاسات حلوة
Thrasher ذهبي على بني كذا زي لون المسترد حلو عالعين وخصوصا عالبشرات الدافية.


اخر شي وأحلى فقرة دايما الارواج ♥



Everlasting Liquid Lipsticks 

الارواج المطفية السائلة من اكثر منتجاتهم شهرة وعليها طلب كبير ودايما سولد اوت بكل مكان.
معاهم حق بالضجة صراحة تستاهل لان تركيبتها حلوة والوانها كمان.
التركيبة مريحة وتحسي جودتها حلوة مو من النوع اللي يقطع او يكتل او يشقق الشفايف
لا يتوزع بشكل مرتب عالشفايف ولون واضح ومطفي بدون مايجفف.
الثبات للامانه مو مرة عالي مقارنة بماركات ثانية زي كلر بوب
لكن يشفعلها انها مريحة وحلوة عالشفايف واقدر اعيد عليها خلال اليوم ماعندي مشكلة.
فرشتها كمان سهلة بالتوزيع وتعطيك تحديد للشفايف ماتحوس الدنيا.

احلى الالوان لوليتا ١ ولوليتا ٢ درجاتهم لحمية طبيعية تناسب الكل وتناسب اي لوك مكياج
حبيت كمان لون Lovesick بنك موفي جميل جدا
والالوان الثانية فوشي وعلى اورنج ان شالله بالصيف راح استخدمهم الوان ملفتة ويبغالها تان ♥.♥
سعره ١٠٠ريال




Studded Kiss Lipstick

هذه نازلة بألوان وتركيبات مجنونة! بعضها الوان كلاسيكية حلوة زي درجات اللحميات والاحمر
 وبعضها الوان مصروعة وجريئة زي الازرق والاسود والاخضر مااتوقع تناسب الكل شخصيا الالوان اللي فيها شمير ماقدرت استعملها لان مااحب اي شي فيه شيمر عالشفايف ولكن لها ناسها.
بالنسبة للتركيبة ساتين مو مطفية يعني مايلة للكريمي اكثر بس ماهي سايحة 
اللون جدا واضح وقوي من مسحة يبان وثباتها وسط ٤ ساعات اقدر اقول.

الالوان اللي عجبتني Lolita طبعا اللي ماتحب الروج السائل وعاجبتها الدرجة ممكن تاخذه لونه لحمي طبيعي
وعجبني Piaf ترى لونه جريء مو الكل راح يتقبله، اللون بني على رمادي حبيته وماعندي ولا درجة زيه.
واللون الثالث Homegirl جريء بس احس في بنات تحب هذه الالوان
جاي توتي غااااامق جدا على سواد بس مميز.
سعرها ١١٠ريال

بس الصراحة الالوان الليكويد تستحق التجربة اكثر من العادية 
العادية لو انتي تدوري على الوان مجنونة وغريبة راح تلاقي طلبك عندهم لكن كالوان ارواج طبيعية جربو الليكويد جميلة جدا.

وهذه تجربتي لمنتجاتهم ان شالله استفدتو من الريفيو واذا جربتو شيء من عندهم شاركونا رأيكم احب دايما نستفيد من بعض ونتناقش بالميك اب هذا السبب اللي يخليني احب التدوين ♥


❤❤

Twitter | Instagram | Email

10 comments:

  1. انا جربت الاي شادو ومرره عجبني و يطول و ثابته حلو 👌😍، انا جربت حق كولكشن الهوليدي و كان بيرفكت نعاي 👌😍😍❤️
    تحمست اجرب الفاونديشن بس هل يناسب الجافة و لا لا ؟

    ReplyDelete
  2. تدوينه مفيده و جمييييييله بجمالك ��
    الروج السائل lovesick
    دورت عليه في سيفورا رد سي مول
    لكن اللي تبيع قالت ما جا عندهم هذا اللون!؟
    كمان أخذت لوليتا ، رووووووعه

    ReplyDelete
  3. حبيبت التدوينة تحمست للكونسيلر و الباودو 😍و الأرواج طبعًا و عندي اللاينر ورهيب

    ReplyDelete
  4. مررره شكراً يعطيك العافيه وصادقه انا جربت الفاونديشن وكثرت منه وطلع بشع على الوجهه وخطط وراح اسوي طريقتك وان شاء الله يضبط معاي ��

    ReplyDelete
  5. وفاء الله يسعدك قد ماتفرحينا انا dalia__artist اللي بالانستقرام
    بس حبيت اسالك اذا انا بخميس مشيط وسيفورا مو عندنا تنصحيني اطلب منتجاتها اون لاين ومن فين والفشكر

    ReplyDelete
  6. حبيييت الفونديشن والباودر 💜✨

    ReplyDelete
  7. شكرا على تعبك والمعلومات حبيييييت
    :)

    ReplyDelete
  8. لو سمحتي انتي ماخذه اي درجة 45 warm or cool?
    و ايش ينفع معاها ك كونسيلر؟

    ReplyDelete

Related Posts Plugin for WordPress, Blogger...