Friday, April 14, 2017

My Skincare Routine + Paula's Choice Review عنايتي ببشرتي وريفيو لمنتجات بولا تشويس





مرحبا ياجميلاتي اشتقنااااااا والله
وحشتوني ووحشتني المدونة
راجعتلكم ببوست من سنوات تطلبوه مني للاسف ماكنت حاسة اني اقدر اوريكم عنايتي ببشرتي قبل 
لأنه كان عندي مشاكل ببشرتي ولا مرة بحياتي كانت بشرتي صافية 
لكن الان الحمدللله جدا مبسوطة ببشرتي متحسنة كثيير بشكل ملحوظ وزادت ثقتي بنفسي اكثر وحبيت افيدكم بكل اللي اتعملته.
طبعا جمال البشرة مايجي من فراغ الا لو محظوظة بجيناتك وبشرتك حلوة من ربنا بس حتى ولو مع الاهمال الا مايسوء وضعها دايما البشرة تتطلب استمرارية وعناية دائمة،،
فالبداية اهم خطوة انصحك فيها لو عندك مشاكل سواء حبوب او غيره راجعي دكتور تثقي فيه 
راح توفري على نفسك وقت ومصاريف كثير بتجربة اشياء وخلطات مالها فايدة وممكن تزيد مشكلتك سوءا فالافضل تشوفي الدكتور ايش يقولك وتعرفي نوع بشرتك وايش المنتجات المناسبة لها والعلاجات اللي ممكن يقدمها لك 
وكل وحدة تختلف عن الثانية لا تشوفي علاجات نزلت جديد او اعلانات عيادات لأجهزة سحرية للبشرة وطيران تسويها ممكن تكون مالها اي فايدة او حتى لها اثار سلبية وممكن بكل بساطة حتى لو ناسبت غيرك ماتناسبك فالافضل دايما استشارة طبيب جلدية معروف وذو خبرة..

من ناحية العناية بالبشرة بحاول أكتبلكم بالتفصيل انا ايش عملت والخطوات اللي اتبعتها مو شرط تكون نفس المنتجات انا اغيرهم كل فترة لكن الروتين والخطوات تبقى ثابتة..
وراح اكتبلكم ريفيو لمنتجات بولا تشويس اللي جربتها وبحطلكم طريقة الطلب وكود خصم لهم لان حقيقة محد متكلم عنها عندنا واشوفها تستحق التجربة..

كمان حبيت اوريكم بلوق لمدونة سكين كير بريطانية اسمها كارولين هيرون اعشقها صراحة غيرت مفاهيم كثيرة عندي واتعلمت منها كثير اشياء اللي تقدر تقرأ بالانجليزي جدا راح تستفيد بحطلكم مختصر لل Cheat Sheet حقتها حاطة فيها كل اساسيات العناية بالبشرة



فالبداية نوع بشرتي دهنية منطقة التي زون ومنتصف منطقة الخدود تدهن عندي مااعاني من اي جفاف او قشور 
معرضة للمسام على منطقة الانف والخدود ،،، الحبوب اكثر شي تطلعلي عالدقن والخدود
 والبشرة الدهنية اكبر خطأ يتعمل لها انك تنشفيها احنا مانبغى ننشف البشرة نبغى نخليها متوازنة قد مانقدر.

اول خطوة في روتيني Double Cleansing تنظيف البشرة العميق


مستحيل اقولكم قد ايش تنظيف البشرة مهم! ماخفت المسام عندي ولا راحت مشاكل البشرة اللي كنت اعاني منها الا لمن بدأت انظف بشرتي بالشكل الصحيح.  
كل انواع البشرات تحتاج تنظيف عميق كل بشرة والمنتجات اللي تناسبها.
اكثر شيء اسويها بالليل وبالصباح اغسل وجهي مرة وحدة فقط، ايش فكرة التنظيف الدبل؟
اول خطوة تشيل كل المكياج او واقي الشمس والاتربة والاوساخ اللي على سطح البشرة.
ثاني خطوة تتأكد انك نظفتي بشرتك مرة كويس والمسام تكون نظيفة من داخل.

ايش المنتجات المستخدمة؟ حسب اللي تفضليه.
عادة احب ابدأ بزيت منظف او زبدة منظفة خصوصا لو كنت حاطه ميك اب من الانواع اللي احبها مجموعة البابونج من بودي شوب.
تذوب كل الميك اب وتشيله وهنا حطيت بوست كامل عنهم هنا

تقدري تستغني تماما عن الزيت وتستعملي منظفات مكياج اللي تحبيها زي مثلا المزيلات المائية مزيل بايوديرما او غارنييه مشكلتها تستهلك قطن كثير ووقت عشان تنظفي كل وجهك وعيونك..
ممكن -مع اني شخصيا مااحبها- بس تقدري تستعملي مناديل مزيلة للمكياج كخطوة اولى بالتنظيف اهم شيء تأكدي انها خالية من العطور..
 لو ماكنتي حاطة مكياج عادي تستعملي نفس غسولك مرتين ورا بعض كذا تتأكدي انك نظفتي بشرتك كويس.

خطوة التنظيف اللي بعدها احب استخدم غسول وعادة يكون جل بحكم بشرتي دهنية كل ماكان نوع بيسك وخال من الكيمكيالز يكون افضل مااحب الانواع الحارة او القوية..
من اللي جربتهم وجدا ناسبوني غسول بولا تشويس
Clear Cleanser 
منظف جل عادي تركيبته بسيطة مافيه فلسفة ولا عطور ولا مكونات تجفف البشرة بالعكس حسيته يوازن البشرة ولا يحسسها.
ممتاز وممكن اطلبه مرة ثانية ولكن له بدائل هنا.
زي غسول بووتس بالصبار Simply Sensitive
خال من العطور والمواد المحسسة والالوان وسعره جدا رخيص حدود ٢٥ ريال ودايما عليه عروض في بووتس
نفس الفكرة مكوناته بسيطة ولا تحسس وماهي قوية عالبشرة. 
اخر نوع حبيته كمان من الصيدليات غسول QV جنتل مايحسس ونفس الشي خال من العطور.

ليش بس اقولكم خال من العطور؟
لأن العطور مالها اي فايدة بالعناية بالبشرة بالعكس قد تضر البشرة اكثر وتهيجها وعادة تنحط بالمنتجات عشان تخبي ريحة الكيميكالز البشعة.

اختاري نوع الغسول المناسب لبشرتك.

اخر نقطة احب اذكرها بالتنظيف العميق اني احيانا احب استعمل الكليراسونك صارلي تقريبا سنتين استعملها اكثر شيء إذا كنت حاطة فل كفرج ميك اب وابغى انظف بشرتي كويس مااستغني عنها


 آلخطوة الثانية  Toners And Exfoliaters (Acid Toners) التونر والمقشرات


 لفترة طوييييييلة كنت مو معترفة بالتونر ابدا وحتى كنت احسبه يخرب البشرة لان فعلا كنت استعمل انواع كانت قوية وتخرب بشرتي وقررت اترك خطوة التونر تماما لمن بدأت اقرأ اكثر خصوصا بلوق كارولين اللي حطيته لكم اكثر شيء كانت تتكلم عنه التونرات خصوصا الانواع المقشرة وكيف انها تفرق بالبشرة وجدا اقتنعت بكلامها وبدأت اجربهم..
التونر وظيفته يوازن البشرة وممكن يكون مقشر او مرطب او معالج او مهديء حسب حاجة بشرتك والنوع اللي تستخدميه
داايما اتأكدي انه يكون خال من الكحول لانه ينشف البشرة بزيادة ويحسسها ويخرب توازن البشرة.

التونرات اللي جربتها كذا نوع

تونر يوازن البشرة زي بولا تشويس Skin Balancing Toner 
يسوي زي اللي مكتوب عالعلبة بالزبط فعلا يوازن البشرة مايخليها ناشفة ولا دهنية بزيادة خال من الكحول والعطور 
كنت استخدمه صباح ومساء بعد الغسول ممتاز ومثالي للبشرة الدهنية وبرجع اطلبه مرة ثانية.

النوع الثاني مهديء للبشرة زي تونر الصبار من بودي شوب
كمان خال من الكحول والعطور والالوان احب استخدمه بالصباح فقط بعد الغسول مرة خفيف ولا يحسس البشرة ويعطيني شعور فريش ممتاز للبشرات الحساسة.

النوع الثالث التونرات المقشرة احماض AHA & BHA 
هذه من جد من يوم مادخلتها في روتيني فرقت بشرتي ٣٦٠ درجة!! اكثر شيء بيفرق معاك ملمس بشرتك بيصير انعم واصفى
حقيقة انا وقفت استخدم مقشرات فيزيكال او اللي تجيك فيها حبيبات تقشير لان برأيي ماتسوي ولا شيء وبعضها تكون خشنة عالبشرة.
المقشرات الاحماض فعالة بشكل اكبر وتقشر البشرة وتجددها بطريقة ملحوظة راح تحسي وجهك صار في نضارة اكثر واتوحد لون البشرة وتخفف البقع والتصبغات مع الوقت تشد البشرة وتبينها اصغر بالعمر.
ممكن تستخدميها تونر بعد الغسول او خطوة تونر اضافية بعد التونر العادي حقك.

ليش مهم نقشر البشرة؟ 
لانه البشرة تجدد بشكل مستمر وتترك خلايا جلد ميت عالوجه احيانا التنظيف مايكفي اننا نشيلها فنحتاج تقشير مستمر لانه تراكم الجلد الميت عالبشرة يسبب خشونة ويسد المسام وتجاعيد وتبين البشرة باهتة..
جدا انصحكم تبدأو تدخلو تونرات مقشرة وبقولكم ايش جربت.

فالبداية الاحماض المقشرة نوعين AHA اللي هو اختصار Alpha Hydroxy Acid عادة يكون جلايكولس او لاكتيك اسيد والنوع الثاني BHA اختصار Beta Hydroxy Acid عادة يكون ساليسلك اسيد
النوعين يشتغلو بنفس الطريقة بس AHA يعتبر مجدد اكثر للبشرة واخف من الثاني مناسب لكل البشرات
 وBHA يعتبر اقوى يقشر المسام من جوا ومناسب جدا للبشرات الدهنية.
راح تحسي بوخز بسيط ببشرتك اول ماتحطيها وهذا شعور طبيعي بس لو حصل احمرار قوي او تهيج معناته قوية بزيادة على بشرتك ووقفيها.
نقطة مهمة لما تستخدمي هذه المقشرات طبيعتها تخلي البشرة شويه تتحسس من الشمس فدايما حطي واقي شمس لا يقل عن SPF30 
 
كيف نبدا نستخدمها؟
اختاري نوع تكون نسبة الحمض فيه قليلة ٥٪ زي تونر بيكسي بالجلايكولس ممتاز لو حابة تبدأي تدخلي مقشرات الاحماض في روتينك عشان لو مو متعودة عليها وبدأتي بنسبة عالية ممكن تحسس بشرتك. ولمن تتعودي عليها مع الوقت تقدري تزيدي النسبة.
تونر بيكسي جدا خفيف ويعطي نضارة حلوة للبشرة وتقدري تستعمليه كل يوم.

في انواع عملية وسريعة زي مسحات الجلايكولكس من صيدلية وايتس ممتازة وعندهم نسب مختلفة.
وهذه الانواع الخفيفة ممكن تستخدميها يوميا يفضل مرة باليوم مساء. وبالصباح تونر يكون عادي مو مقشر. 

تونرات بولا تشويس المقشرة
جربت نوعين 
الاول  2% Clear BHA (Salicylic Acid)
مقشر ساليسلك اسيد يعتبر شويه مكثف بنسبة ٢٪ الساليسلك اسيد معروف انه يحارب الحبوب ومناسب جدا للبشرة الدهنية احب احطه اذا حسيت بشرتي محببة او راح تطلعلي حبوب على طول اصحى القاها خفت تماما وممكن بس تحطيه عالاماكن اللي فيها حبوب مو شرط عل كل الوجه.

النوع الثاني Resist Weekly resurfacing AHA 10%
هذا مقشر جلايكولكس زي مو مكتوب عليه ويكلي يعني للاستخدام الاسبوعي من اليومي نسبته شويه عالية بس لو متعودة عليه عادي استخدمه مرة بالاسبوع يعطي زي تقشير عميق ممتاز يجدد البشرة وممكن مع الوقت تصيري تستخدميه مرتين بالاسبوع ومناسب لكل البشرات.

عندهم كثييير انواع لك البشرات ولكل استخدام 
وممكن خطوة مقشر الاحماض تكون على شكل كريم او سيرم مو شرط تونر وموجود كثير كريمات بالجلايكولكس حلوة للبشرة بس حسيت انسب طريقة ليا استعملها على شكل تونر واستخدم مرطب عادي بعدها.


الترطيب Moisturizers and Serums 


 بما انه البشرة صارت نظيفة ومقشرة وجاهزة الان نقدر نرطبها ونتأكد انها راح تستفيد من المرطب اللي نحطه 
وتترطب بعمق 
مهم جدا كبشرة دهنية تهتمي بنوع المرطب اللي تستخدميه. دايما ابعدي عن الكريمات الثقيلة والزيوت 
انا ماخليت ولا بقيت كريم ولا منتج ترطيب ماجربته لمن اقتنعت ان انسب شيء لترطيب بشرتي السيرومات الخفيفة او المرطبات الجل المائية. 
ليش مهم نرطب البشرة الدهنية؟ لانه قلة الترطيب بتخلي البشرة تفرز دهون زيادة عشان ترطب نفسها وبالتالي تصير Dehydrated وناقصها مويه وتبين باهتة وهذا وضع اغلب اصحاب البشرة الدهنية.
لمن نرطبها تحافظ على توازنها اكثر.
من احلى منتجات الترطيب اللي جربتها (خلصته حاليا) هيلارونك اسيد من بولا تشويس
زي كل منتجاتها خال من العطور
الهيلارونك اسيد يرطب البشرة من جوا يخفف الخطوط التعبيرية والبهتان بالبشرة وحبيت ان قوامه جل مائي مناسب لبشرتي 
كنت احب اضيف معاه فيتامين سي برضو من بولا تشويس ممتاااز وكمان راح ارجع اطلبه 
فيتامين سي اغلب الموجود عندنا بالكريمات يكون تركيبته من النوع اللي يتأكسد بسرعة وتروح فايدته 
مهم يكون بعلبة غامقة وتحفظيه بعيد عن الاضاءة والشمس عشان لا يتأكسد ولا تخلي العلبة مفتوحة وقت طويل
فايدة فيتامين سي من جد يوحد لون البشرة ويصفيها.
اللي حاليا قاعدة استخدمه من ماركة كورية وصلتني من @beautyRoutin

السيروم اللي استعمله حاليا كيلز Hydro Plumping 
قوامه نفس الشيء جل مائي لسا جديد بدأت استعمله ولكن للان جدا مناسبني ترطيبه مناسب ولا يدهن البشرة وحبيت انه مافيه عطور ومكوناته ممتازة

 اخر خطوة بالترطيب اليومي كريم العين
تقدري تستخدمي اي كريم عين يناسبك 
عموما كريم العين مايسوي سحر لكن يساعد على ترطيب منطقة تحت العين واللي فرق معايا جدا الخطوط الدقيقة تحت العين تخف وتبين العين مرتاحة اكثر 
اكبر خطأ تستخدمي كمية كبيرة منه ترى ممكن تسوي نتيجة عكسية وتزيد الانتفاخ والخطوط تحت العين
فقط تحتاجي مسحة بسييييطة وبالتربيت وزعيها ولا تقربيه مرة من عينك. 

وروتيني باختصار يتركز بالليل اكثر شيء:
انظف بشرتي تنظيف عميق
تونر عادي
تونر مقشر
سيرم للوجه
كريم للعيون

وبالصباح فقط انظف بشرتي مرة وحدة بالغسول
استخدم تونر عادي وبعده واقي شمس ممتاز من بولا تشويس بكتبلكم عنه بعد شويه.
 


العناية الاسبوعية (ماسكات) Face Masks 
اللي تتابعني من فترة تعرف قد ايش احب الماسكات بجميع انواعها 
واحرص اني استخدمها بشكل اسبوعي كل مرة حسب ايش بشرتي تحتاج 
ولو عندي مناسبة يكون وقت بيرفكت ادلع بشرتي بماسك قبلها. 
الماسكات ميزتها تعطيك نتيجة فورية سواء كانت تنظيف او ترطيب او نضارة 
وماهي للاستخدام اليومي يفضل مرة الى مرتين بالاسبوع فقط.
من انواع الماسكات اللي استخدمها:

الماسكات الطينية وماسكات الفحم:
عادة هذه الانواع تنظف من قللللب وتطلع كل الزيوت والاوساخ من البشرة 
زي ماسك الديتوكس من بوبي براون وفيه له بدائل كثير.

الماسكات الليلية:
هذه من الانواع المرطبة احب استخدمها قبل ماانام تعطيني ترطيب حلو من احلى الانواع اللي جربتها هايدرا لايف من ديور وماسك الورد الانجليزي من بودي شوب لان قوامهم جل خفيف وترطيبهم مرة مناسب للبشرة الدهنية.

الشيت ماسك: 
تعطي تاثير خفيف بالترطيب واحب كيف تخلي البشرة منتعشة وريلاكس
 استعملها عادة قبل المكياج او قبل النوم وبعد مااستعمل ماسك طيني ترجع ترطبلي البشرة 

ماسكات النضارة والترطيب:
زي ماسك الارز وماسك العسل من بودي شوب والكركم من كيلز كلها مخصصة لتجديد ونضارة البشرة حلوة كمان قبل المكياج.


بالنسبة لمنتجات بولا تشويس غير اللي ذكرتهم فوق
 في منتج مرررة احبه اعتذر نسيت اصوره 

 
بس لازم اقولكم عنه اللي هو واقي الشمس يعتبر مرطب خفيف وواقي بنسبة SPF 30 
وفيه تنت بسيط جدا يتوحد مع لون البشرة عشان مايبين لونه ابيض 
ممتاز للدوام وقوامه مطفي ابدا مايدهن ولا احس فيه عالبشرة 
خال من العطور ولا يحسس
يعتبر واقي شمس فيزيائي وشخصيا افضله عن النوع الكيميائي وشوفو مدونة الجميلة Skin Overdose متكلمة عن هذا الموضوع بالتفصيل ببوست جدا مفيد

 
 
بالنسبة لمنتجات بولا تشويس حاليا عندهم خصم مستمر لحد شهر ماي اعتقد على كل المنتجات وكمان اذا طلبتو من الرابط هذا تلقائيا ينخصملكم  ١٠دولار زيادة يعني الاسعار بتكون مرة حلوة

طريقة الطلب سهلة جدا اختاري المنتجات اللي حابتها وطريقة الدفع استخدمت فيزا تسوق الراجحي 
والشحن يفضل صندوق بريد امريكي لان دايركت مع منتجات سوائل ممكن ماتوصل.
انا شحنتها على ارامكس شوب اند شيب.



وبس ان شالله مااكون ثقلت عليكم بالكلام حبيت اقولكم طريقتي بالتفصيل ان شالله تكونو استفدتو 
ولو حابين تسألو عن اي شي قولولي وارجع اضيفه عالبوست.



8 comments:

  1. يا ربي وأخيرًا لقيت أحد مثلي يحب كارولاين. اعشق مدونتها واعشق سوالفها باليوتيوب والانستاقرام. يعطيك الف عافيه على التدوينه يا وفااء جدا اعجبني اسلوبك واهتمامك بالتفاصيل والشرح الوافي.

    ReplyDelete
  2. لو سمحتب تعرفبن اذا ورلد شيب يسمحون بشحن منتجات بولا تشويس من امريكا؟ ودي اخذ مقشر السالسلك بس خايفه ما يشحنونه

    ReplyDelete
  3. شركة دهب كلين تقدم افضل خدمات تنظيف بامدينة الاحساء

    شركة تنظيف بالاحساء
    تنظيف باحداث الطرق الحديثه دهب كلين تقدم افضل خدمات التنظيف

    ReplyDelete

Related Posts Plugin for WordPress, Blogger...